Summary :
दहा वर्षांची मेहनत फळाला
स्थानिक खेळाडूंना मिळणार नवी दिशा
सर्व स्तरातून अभिनंदनाचा वर्षाव
ग्रामीण भागातील खेळाडूंना योग्य मार्गदर्शन मिळाल्यास ते राष्ट्रीय स्तरावरही आपली छाप पाडू शकतात, हे पुन्हा एकदा सिद्ध झाले आहे. येवल्यातील ‘बनकर पाटील स्पोर्ट्स अकॅडमी’चे मुख्य प्रशिक्षक राजेंद्र सिंग यांची 2025-26 या डोमेस्टिक क्रिकेट सीझनसाठी अरुणाचल प्रदेश राज्याच्या रणजी ट्रॉफी संघात निवड झाली आहे. रणजीसारख्या प्रतिष्ठेच्या स्पर्धेसाठी निवड होणे, हा केवळ राजेंद्र सिंग यांच्यासाठीच नव्हे, तर येवल्यासारख्या शहरासाठीही अभिमानाचा क्षण आहे. विशेष म्हणजे, मागील वर्षी 2024-25 च्या हंगामातही त्यांची अरुणाचल प्रदेश संघासाठी निवड झाली होती, त्यामुळे त्यांची ही निवड त्यांच्या सातत्यपूर्ण योगदानाची पावती आहे.
राजेंद्र सिंग गेल्या दहा वर्षांपासून ‘बनकर पाटील स्पोर्ट्स अकॅडमी’मध्ये मुख्य प्रशिक्षक म्हणून कार्यरत आहेत. त्यांच्या मार्गदर्शनाखाली अनेक युवा खेळाडू घडले आहेत. त्यांनी आपल्या मेहनतीने आणि अनुभवाने खेळाडूंना प्रशिक्षण दिले आहे. त्यांच्या या निवडीमुळे अकॅडमीतील खेळाडूंमध्ये उत्साहाचे वातावरण आहे. त्यांच्या निवडीचा फायदा भविष्यात अकॅडमीतील युवा खेळाडूंना नक्कीच होईल, असा विश्वास अकॅडमीचे अध्यक्ष श्री प्रवीण बनकर यांनी व्यक्त केला आहे.
राजेंद्र सिंग यांच्या निवडीमुळे ‘बनकर पाटील स्पोर्ट्स अकॅडमी’चे खेळाडू येत्या हंगामात राज्यस्तरीय स्पर्धेत चांगली कामगिरी करतील, अशी आशा व्यक्त केली जात आहे. राजेंद्र सिंग यांनी स्वतःच याबद्दल विश्वास व्यक्त केला आहे. ‘माझ्या अनुभवाचा आणि मार्गदर्शनाचा फायदा अकॅडमीतील खेळाडूंना नक्कीच होईल,’ असे ते म्हणाले. त्यांचे अनुभव, त्यांची जिद्द आणि मार्गदर्शन यामुळे अकॅडमीचे खेळाडू भविष्यात जिल्हा, राज्य आणि राष्ट्रीय स्तरावर आपली गुणवत्ता सिद्ध करतील, असा विश्वास अध्यक्ष प्रवीण बनकर यांनी व्यक्त केला.
हे वाचलं का? – धक्कादायक! मुतखड्याच्या उपचारासाठी गेला अन् किडनीशिवाय परतला; शेतकऱ्यांसोबत नेमकं काय घडलं?
राजेंद्र सिंग यांच्या या यशाबद्दल त्यांचे सर्व स्तरातून अभिनंदन होत आहे. ‘बनकर पाटील स्पोर्ट्स अकॅडमी’च्या पदाधिकाऱ्यांनी त्यांचा सत्कार करून त्यांना पुढील वाटचालीस शुभेच्छा दिल्या. अध्यक्ष प्रवीण बनकर, कार्याध्यक्ष डॉ. राहुल काकड, सुरज पटणी, सचिव ॲड. सुजाता सिंग, महेंद्रसिंग राजपूत आणि भिवसेन कोपनर यांनी त्यांच्या निवडीबद्दल आनंद व्यक्त केला. या यशामागे अकॅडमीचे अध्यक्ष प्रवीण बनकर, कार्याध्यक्ष डॉ. राहुल काकड आणि राजेंद्र सिंग यांच्या पत्नी सुजाता सिंग यांचे मोलाचे सहकार्य आहे, असेही राजेंद्र सिंग यांनी सांगितले.
राजेंद्र सिंग यांच्या निवडीमुळे येवल्यातील क्रिकेटला एक नवीन ओळख मिळाली आहे. त्यांच्यासारख्या अनुभवी प्रशिक्षकामुळे स्थानिक खेळाडूंना मोठी प्रेरणा मिळाली आहे. त्यांचे यश हे अनेक नवोदित खेळाडूंसाठी एक आदर्श आहे.
Get the latest Marathi news, Maharashtra news, and updates from politics, election, sports, entertainment, health, agriculture, business, and religion – only on headlinesmarathi.com.
