वैजापूर । दिपक बरकसे
वैजापूर तालुक्यातील खंबाळा शिवार येथे एका शेतकऱ्याच्या घरात चोरीची घटना घडली आहे. अज्ञात चोरट्यांनी घराच्या किचनचा दरवाजा तोडून आत प्रवेश केला आणि रोख रक्कम तसेच सोन्याचे दागिने लंपास केले.
ही घटना ८ मार्च रोजी मध्यरात्रीच्या सुमारास घडली. या घटनेमुळे परिसरात भीतीचे वातावरण पसरले आहे. खंबाळा शिवार येथे राहणारे जितेंद्र नामदेव खंडागळे (वय ४९) हे आपल्या कुटुंबासह शेती व्यवसाय करून उदरनिर्वाह करतात. त्यांच्या घरात तीन खोल्या असून, त्यात हॉल, किचन व बेडरूम आहे. ७ मार्च रोजी रात्री १०.३० वाजता ते पत्नी आणि मुलांसह हॉलमध्ये झोपी गेले. सकाळी ५.३० वाजता उठल्यानंतर त्यांनी बेडरूमकडे पाहिले असता कपाटांचे दरवाजे उघडे दिसले आणि आतील सामान अस्ताव्यस्त पडलेले होते.
हे वाचलं का? – प्रेमात आंधळ्या झालेल्या आईनेच पोटच्या गोळ्याला संपवलं, अनैतिक संबंधातून प्रियकराच्या मदतीने काढला काटा
पत्नीला उठवून त्यांनी कपाटांची पाहणी केली असता रोख रक्कम व सोन्याचे दागिने गायब असल्याचे आढळून आले. या घटनेची माहिती त्यांनी तत्काळ पोलिसांना दिली. कपाटात ठेवलेले रोख ७५ हजार रुपये, सोन्याची अंगठी, नेकलेस व बाळ्या असा एकूण १ लाख २० हजारांचा ऐवज लंपास केला. या घटनेची माहिती मिळताच स्थानिक पोलिसांनी घटनास्थळी भेट दिली. चोरी करणाऱ्या चोरट्यांचा शोध घेण्यासाठी तपास सुरू आहे.
या घटनेमुळे परिसरातील नागरिकांमध्ये भीतीचे वातावरण पसरले आहे. स्थानिक नागरिकांनी पोलिसांकडे परिसरात गस्त वाढवण्याची मागणी केली आहे. चोरट्यांचा बंदोबस्त करण्यासाठी तातडीने उपाययोजना करण्यात याव्यात, अशीही मागणी होत आहे. ही चोरी कशामुळे घडली? चोरट्यांचा माग कधी लागणार? यावर अद्याप स्पष्टता आलेली नाही. मात्र, लवकरात लवकर चोरट्यांचा शोध लागेल आणि त्यांना कठोर शिक्षा होईल, अशी अपेक्षा आहे.
तुमच्या भागातील प्रत्येक घडामोडीची ताजे अपडेट्स मिळवण्यासाठी आमच्या व्हॉट्सॲप ग्रुपला ॲड व्हा
