वैजापूर । दीपक बरकसे
वैजापूर येथील महाराष्ट्र ग्रामीण बँकेच्या शाखेला (Maharashtra Gramin Bank) पहाटे लागलेल्या भीषण आगीत बँक पूर्णपणे जळून खाक झाली आहे. चोरट्यांनी बँक लुटण्याच्या प्रयत्नात गॅस कटरचा वापर केला, मात्र त्यातून स्फोट होऊन आग लागल्याची प्राथमिक माहिती पोलिसांनी दिली. या घटनेत चोरटे फरार झाले असून, त्यांनी वापरलेली गाडी पोलिसांच्या ताब्यात आहे. (Vaijapur bank fire)
पोलिसांनी दिलेल्या माहितीनुसार, आज पहाटे तीनच्या सुमारास काही चोरट्यांनी बँकेची सेटल तोडण्याचा प्रयत्न केला. यासाठी त्यांनी गॅस कटरचा वापर केला. मात्र, गॅस कटर हाताळताना अचानक स्फोट झाला आणि त्यातून आगीचा भडका उडाला. काही मिनिटांतच आग संपूर्ण बँकेत पसरली आणि बँकेची इमारत पूर्णपणे जळून खाक झाली. चोरट्यांनी घटनास्थळावरून पळ काढला. (bank robbery fire accident)
हे वाचलं का? – वैजापूर तालुक्यात भीषण अपघात; भरधाव कार पलटी होऊन दोन भावांचा मृत्यू
आगीच्या घटनेनंतर पोलिसांनी तातडीने तपास सुरू केला. चोरट्यांनी पलायनासाठी वापरलेली गाडी घटनास्थळाजवळ सापडली आहे. प्राथमिक तपासात ही गाडी चोरीची असल्याचे समोर आले आहे. पोलिस आता गाडीच्या मालकाचा शोध घेत असून, चोरट्यांचा माग काढण्यासाठी सीसीटीव्ही फुटेज आणि इतर पुराव्यांचा आधार घेत आहेत. (gas cutter explosion in bank)
हे वाचलं का? – डोंगरथडीत हाहाकार माजवणारा नरभक्षक बिबट्या अखेर जेरबंद; तीन महिन्यांपासून घालत होता धुमाकूळ
बँकेच्या शाखा व्यवस्थापक बजरंगलाल ढाका यांनी खातेदारांना दिलासा देताना सांगितले की, या आगीमुळे खातेदारांच्या पैशांना कोणताही धोका नाही. “बँकेतील सर्व व्यवहार लवकरच पूर्ववत होतील. खातेदारांनी घाबरून जाऊ नये, त्यांचे पैसे पूर्णपणे सुरक्षित आहेत,” असे त्यांनी स्पष्ट केले. (bank fire news)
वैजापूर येथील या घटनेमुळे स्थानिकांमध्ये प्रचंड खळबळ उडाली आहे. बँक ही परिसरातील अनेक नागरिकांसाठी आर्थिक व्यवहारांचे प्रमुख केंद्र आहे. आगीमुळे बँकेचे कामकाज काही काळासाठी विस्कळीत होण्याची शक्यता आहे. स्थानिकांनी बँक प्रशासनाकडून लवकरात लवकर उपाययोजना करण्याची मागणी केली आहे. (robbery attempt in Vaijapur)
पोलिसांनी या प्रकरणाचा तपास सुरु केला आहे. चोरट्यांचा शोध घेण्यासाठी विशेष पथक स्थापन करण्यात आले आहे. गॅस कटरच्या स्फोटामुळे आग लागल्याचे प्राथमिक निष्कर्ष असले, तरी पोलिस सर्व बाजूंनी तपास करत आहेत. यामध्ये बँकेच्या सुरक्षाव्यवस्थेतील त्रुटींचाही समावेश आहे. स्थानिक पोलिस ठाण्याचे निरीक्षक यांनी सांगितले की, लवकरच चोरट्यांना अटक करण्यात येईल.
या घटनेनंतर बँक प्रशासन आणि पोलिसांनी नागरिकांना शांतता राखण्याचे आणि अफवांवर विश्वास न ठेवण्याचे आवाहन केले आहे. कोणत्याही संशयास्पद हालचाली दिसल्यास तातडीने पोलिसांशी संपर्क साधण्याचेही सांगण्यात आले आहे.
