दाक्षिणात्य सिनेसृष्टीतील ‘थलापति’ म्हणून ओळखले जाणारे लोकप्रिय अभिनेते आणि नुकतेच राजकारणात सक्रिय झालेले विजय यांच्या तामिळनाडू वेत्री कळघम (TVK) पक्षाच्या रॅलीत शनिवारी एक मोठी आणि हृदयद्रावक दुर्घटना घडली.
तामिळनाडूच्या करूर येथे आयोजित करण्यात आलेल्या या जाहीर सभेत झालेल्या चेंगराचेंगरीत (Stampede) आतापर्यंत किमान ३१ जणांचा दुर्दैवी मृत्यू झाल्याची भीती व्यक्त होत आहे, तर अनेक लोक गंभीर जखमी झाले आहेत. इतक्या मोठ्या प्रमाणात निष्पाप कार्यकर्त्यांचा मृत्यू झाल्यामुळे राजकीय वर्तुळात आणि नागरिकांमध्ये हळहळ व्यक्त केली जात आहे. स्थानिक प्रशासनाने मृतांचा आकडा वाढण्याची भीती वर्तवल्यामुळे संपूर्ण राज्यात चिंतेचे वातावरण निर्माण झाले आहे.
नेमके काय घडले? गर्दीत गोंधळ का उडाला?
करूर येथे अभिनेता विजय यांच्या नेतृत्वाखालील TVK पक्षाच्या रॅलीचे आयोजन करण्यात आले होते. पक्षाच्या प्रमुख नेत्याची झलक पाहण्यासाठी या रॅलीत तुफान गर्दी झाली होती. अभिनेता विजय एका व्हॅनवर उभे राहून कार्यकर्त्यांना संबोधित करत होते, तेव्हाच ही दुर्दैवी घटना घडली.
मिळालेल्या माहितीनुसार, विजय यांचे भाषण सुरू असताना, त्यांच्या काही पदाधिकाऱ्यांनी त्यांना ‘एक मुलगा हरवला आहे’ याची माहिती दिली. गर्दीचे गांभीर्य लक्षात घेऊन विजय यांनी लागलीच माईकवरून कार्यकर्त्यांना आवाहन केले. “एक मुलगा हरवला आहे, त्याला शोधण्यासाठी तातडीने मदत करा आणि पोलिसांना सहकार्य करा,” असे आवाहन त्यांनी केले आणि त्यानंतर ते त्वरित स्टेजवरून खाली उतरले. विजय यांचे अचानक स्टेजवरून खाली उतरणे आणि हरवलेल्या मुलाच्या शोधासाठी झालेल्या गोंधळामुळे गर्दीत एकच धावपळ उडाली. यामुळे चेंगराचेंगरी झाली. अनेक कार्यकर्ते, तसेच काही मुले गुदमरून बेशुद्ध पडले, तर काही जण गर्दीत दाबले गेले. अचानक झालेल्या या घटनेत ३१ हून अधिक जणांचा मृत्यू झाल्याचे समोर आले आहे.
दुर्घटना घडत असताना विजय थलापति घटनास्थळी उपस्थित होते. परिस्थितीचे गांभीर्य आणि विदारक दृश्य पाहून त्यांनी लगेचच आपले भाषण थांबवले. त्यांनी स्वतः स्टेजवरून पाण्याच्या बाटल्या गर्दीकडे फेकून लोकांना मदत करण्याचा प्रयत्न केला. मात्र, गर्दी इतकी जास्त होती की, बेशुद्ध झालेल्या आणि जखमी झालेल्या लोकांना तातडीने रुग्णालयात हलवण्यासाठी रुग्णवाहिकांना घटनास्थळापर्यंत पोहोचणे कठीण झाले. अखेरीस, बेशुद्ध झालेल्या लोकांना जवळच्या रुग्णालयात दाखल करण्यात आले आहे. यापैकी अनेक जखमींची प्रकृती गंभीर असल्याचे डॉक्टरांनी सांगितले आहे, त्यामुळे मृतांचा आकडा वाढण्याची भीती प्रशासनाने व्यक्त केली आहे.
या हृदयद्रावक दुर्घटनेबद्दल तामिळनाडूचे मुख्यमंत्री एम.के. स्टालिन यांनी ‘X’ समाजमाध्यमावर पोस्ट करत तीव्र दुःख व्यक्त केले आहे. त्यांनी म्हटले आहे की, “करूरमधून आलेली ही बातमी अत्यंत चिंताजनक आहे.” मुख्यमंत्र्यांनी प्रशासनाला तातडीने आदेश दिले आहेत. त्यांनी चेंगराचेंगरीमुळे बेशुद्ध झालेल्या आणि जखमी झालेल्या नागरिकांना तातडीने आणि युद्धपातळीवर वैद्यकीय सुविधा पुरवण्याचे निर्देश दिले आहेत. त्यांनी माजी मंत्री व्ही. सेंथिलबालाजी, आरोग्य मंत्री मा. सुब्रमण्यन आणि जिल्हाधिकारी यांच्याशी थेट संपर्क साधून परिस्थितीची माहिती घेतली आणि त्यांना आवश्यक सूचना दिल्या आहेत.
एडीजीपी यांच्याशीही चर्चा करून लवकरात लवकर परिस्थिती सुधारण्यासाठी तातडीने पाऊले उचलण्याचे निर्देश त्यांनी दिले आहेत. विशेषतः, जवळच्या त्रिची जिल्ह्यातील मंत्री अनबिल महेश यांनाही तातडीने घटनास्थळी पोहोचून आवश्यक मदत उपलब्ध करून देण्याचे आदेश देण्यात आले आहेत. मुख्यमंत्र्यांनी नागरिकांनाही पोलीस, प्रशासन आणि डॉक्टरांना मदत करण्याचे कळकळीचे आवाहन केले आहे.
अभिनेता विजय यांच्या TVK पक्षाच्या नमक्कल आणि करूर येथील दोन्ही निवडणूक रॅलींना मोठी गर्दी झाली होती. या रॅलींदरम्यान विजय यांनी राज्यातील सत्ताधारी पक्ष द्रमुक (DMK) आणि विरोधी पक्ष एआयएडीएमके (AIADMK) वर जोरदार हल्ला चढवला. विजय यांनी आपल्या भाषणात स्पष्टपणे सांगितले की, “आमचा TVK पक्ष भाजपशी युती करणार नाही आणि आम्ही खोटी आश्वासने देणार नाही.” त्यांनी सध्याच्या राज्य सरकारवर रस्ते, आरोग्यसेवा, स्वच्छ पाणी आणि सुरक्षा यांसारख्या मूलभूत सुविधा पुरवण्यात अपयशी ठरल्याचा थेट आरोप केला. “२०२६ मध्ये खरी लढत द्रमुक आणि टीव्हीके यांच्यात होईल. या लढतीत भ्रष्ट प्रशासनाविरुद्ध जनतेची शक्ती लढवली जाईल,” असा स्पष्ट इशारा त्यांनी दिला. तसेच, ‘मी दर शनिवारी राज्यातील विधानसभा मतदारसंघांना भेट देईल,’ असेही त्यांनी जाहीर केले होते.
एका राजकीय रॅलीत इतक्या मोठ्या प्रमाणात चेंगराचेंगरी होऊन निष्पाप नागरिकांचा मृत्यू होणे, ही बाब अत्यंत गंभीर आहे. मोठ्या जनसमुदायाचे व्यवस्थापन आणि सुरक्षा व्यवस्थेतील त्रुटी यावर या घटनेने पुन्हा एकदा मोठे प्रश्नचिन्ह निर्माण केले आहे. विशेषत: राजकीय नेते जनतेत मिसळण्याचा प्रयत्न करत असताना, त्यांच्या सुरक्षेसोबतच गर्दीच्या सुरक्षिततेची काळजी घेणे अत्यावश्यक आहे.
करूर येथील या दुर्घटनेमुळे संपूर्ण तमिळनाडू शोकसागरात बुडाला आहे. प्रशासनाने या घटनेची गंभीर दखल घेऊन भविष्यात अशा घटना टाळण्यासाठी कठोर उपाययोजना करणे गरजेचे आहे. जखमींना तातडीने पूर्ण उपचार मिळावेत आणि मृतांच्या कुटुंबीयांना सरकारने भरीव मदत करावी, अशी अपेक्षा व्यक्त केली जात आहे. पोलीस या प्रकरणाचा तपास करत आहेत.
Get the latest Marathi news, Maharashtra news, and updates from politics, election, sports, entertainment, health, agriculture, business, and religion – only on headlinesmarathi.com.
