हरियाणातील पानीपत शहरातून आलेल्या एका बातमीने संपूर्ण देशात एक अनामिक धडकी भरवली आहे. माणुसकी आणि क्रूरता यांच्यातील सीमारेषा पुसून टाकणारी ही घटना, केवळ एका महिलेच्या विकृत विचारसरणीचा परिणाम नसून, समाजातील टोकाच्या ईर्ष्या (Jealousy) आणि असुरक्षिततेची (Insecurity) भयावह परिणती आहे.
आपल्या सौंदर्याबद्दलची राक्षसी ईर्ष्या मनात बाळगून एका मातेने गेल्या दोन वर्षांत तब्बल चार निष्पाप आणि निरागस लहान मुलांची निर्घृण हत्या केल्याचे उघड झाले आहे. या घटनेने पानीपतसह सोनीपत भागातील नागरिकांना मोठा धक्का बसला असून, क्रूरतेच्या या पाऊलखुणांनी संपूर्ण देशाला अंतर्मुख केले आहे.
या प्रकरणाची गंभीरता लक्षात घेऊन पानीपतचे पोलीस अधीक्षक (SP) भूपेंद्र सिंग यांनी स्वतः पत्रकार परिषदेत माहिती दिली. त्यांनी स्पष्ट केले की, अटक करण्यात आलेली पूनम (मूळ रहिवासी, भावड गाव, सोनीपत) हिची विचारसरणी अत्यंत विकृत आणि ‘सायको किलर’ प्रकारची आहे. एसपी सिंग यांच्या माहितीनुसार, पूनमला आपल्यापेक्षा अधिक सुंदर दिसणाऱ्या लहान मुलींचा तीव्र तिरस्कार होता.
‘भविष्यात कोणतीही मुलगी माझ्यापेक्षा जास्त सुंदर दिसू नये, तिने मला झाकोळून टाकू नये’, या टोकाच्या भीतीतून आणि ईर्षेतून तिने हे अमानुष कृत्य केल्याचे समोर आले आहे. ही विचारसरणी सामान्य मानसिकतेपेक्षा पूर्णपणे वेगळी असून, तिची मानसिक तपासणी करणे गरजेचे आहे. पूनमने निवडलेले बळी, त्यांचे निरागस वय आणि हत्येमागील हेतूंमुळे हे प्रकरण अत्यंत दुर्मीळ आणि चिंताजनक ठरले आहे.
( नक्की वाचा : पेढ्यातून गुंगीचे औषध, अश्लील VIDEO अन् दोन वर्ष…; मुख्यध्यापकाचं भयंकर कृत्य)
पोलिसांनी दिलेल्या माहितीनुसार, पूनमने आपल्या क्रूरतेचा प्रवास 2023 मध्ये सुरू केला. सुरुवातीला तिने आपल्या नातेवाईकांमधील आणि कुटुंबातीलच सुंदर दिसणाऱ्या मुलींना लक्ष्य केले. 2023 मध्ये तिने आपल्या नणंदेच्या मुलीची आणि भाच्याची हत्या केली. कुटुंबात एकापाठोपाठ झालेल्या दोन निष्पाप मुलांच्या मृत्यूमुळे हळहळ व्यक्त झाली, मात्र कोणालाही हत्येचा संशय आला नाही.
पूनमचे मनसुबे अधिक खतरनाक होते. वारंवार कुटुंबातीलच मुलांचा मृत्यू होत राहिला तर संशय वाढू शकतो, या भीतीने तिने आपल्या क्रूरतेचे जाळे अधिक विणले. तिने ‘मी संशयाच्या पलीकडे आहे’ हे दाखवण्यासाठी स्वतःच्या दोन मुलांपैकी एका लहान मुलालाही मारून टाकले. या कृत्यामागील तिची क्रूर बुद्धी आणि थंड डोक्याने नियोजन करण्याची क्षमता पाहून पोलीसही अचंबित झाले आहेत. चौकशीदरम्यान तिने कबूल केले की, सुंदर मुली मोठ्या झाल्यावर आपल्यापेक्षा जास्त आकर्षक दिसतील, या भीतीमुळेच तिने या भयानक हत्या केल्या.
ऑगस्ट 2025 मध्ये पानीपतच्या सिवाह गावामध्ये झालेल्या एका 6 वर्षांच्या निरागस मुलीच्या हत्येनंतर पूनम अखेरीस कायद्याच्या जाळ्यात अडकली. ही घटना तिच्या क्रूरतेच्या मालिकेतील चौथी आणि शेवटची घटना ठरली. या मुलीचा मृत्यू पाण्याच्या टबमध्ये बुडून झाला होता, मात्र घटनास्थळाच्या तपासणीत अनेक विसंगती आढळल्या. सर्वात महत्त्वाचे म्हणजे, ज्या खोलीत मुलीचा मृत्यू झाला, त्या खोलीचा दरवाजा बाहेरून बंद होता. या एकाच पुराव्यामुळे पोलिसांनी या प्रकरणाला अपघाती मृत्यू मानणे थांबवले आणि सखोल चौकशी सुरू केली.
( नक्की वाचा : BMW कार, iPhone अन् कोट्यवधी…; ‘रील स्टार’ने इन्स्टाग्रामवर गर्भश्रीमंत मुलींना पटवून माया जमवली)
पोलिसांनी या हत्येचा धागा पकडत सर्व संभाव्य लोकांची चौकशी सुरू केली. तेव्हा एका गोष्टीने पोलिसांचे लक्ष वेधले, पूनम दिसायला हुशार आणि समजूतदार असली, तरी सुंदर मुलींना बघताच तिचा पारा चढायचा, अशी माहिती एसपींना मिळाली. पोलिसांनी कसून चौकशी केली असता, पूनमनेच त्या 6 वर्षांच्या मुलीला आत नेले आणि दरवाजा बाहेरून लावून तिची हत्या केल्याचे स्पष्ट झाले.
पोलिसांच्या सखोल चौकशीदरम्यान पूनमने अखेरीस आपला गुन्हा कबूल केला. तिच्या विचारसरणीतील विकृती आणि आत्म-सुरक्षेची भावना किती टोकाची होती, हे तिने स्वतःच्या तोंडून सांगितले. आपण पकडले जाऊ नये म्हणून तिने स्वतःच्या मुलाला मारून टाकण्याची कबुली दिली. ‘मुलगी मोठी होऊन माझ्यापेक्षा अधिक सुंदर दिसू नये’, केवळ या एका कारणामुळे तिने चार निष्पाप जीवांचा बळी घेतला. सोनीपतच्या भावड गावची रहिवासी असलेल्या पूनमच्या या कृत्यांमुळे संपूर्ण समाजात संतापाची लाट उसळली आहे.
अखेरीस पकडली गेल्यानंतर तिला आपल्या कृत्याचा पश्चात्ताप होत असल्याचे पोलिसांनी सांगितले असले तरी, गेल्या दोन वर्षांत तिने केलेल्या या क्रूर हत्यांनी मातृत्वाच्या आणि माणुसकीच्या नात्याला काळिमा फासला आहे. या घटनेने समाजात एकच खळबळ उडाली असून, ‘सायको किलर’ ठरलेल्या पूनमवर कठोर आणि जलद कारवाई करण्याची मागणी सर्व स्तरांतून होत आहे. या घटनेमुळे पालकांनी आपल्या मुलांची सुरक्षा आणि त्यांच्या आजूबाजूच्या लोकांची मानसिक स्थिती तपासणे किती महत्त्वाचे आहे, यावर गंभीर विचार करण्याची वेळ आली आहे.
Get the latest Marathi news, Maharashtra news, and updates from politics, election, sports, entertainment, health, agriculture, business, and religion – only on headlinesmarathi.com.
