वैजापूर । दिपक बरकसे
शहराच्या शांततेला नख लावणाऱ्या आणि कर्णकर्कश आवाजाने नागरिकांची झोप उडवणाऱ्या दुचाकीस्वारांविरुद्ध आता वैजापूर पोलिसांनी आक्रमक पाऊल उचलले आहे. ‘ठक-ठक’ असा आवाज करत रस्त्यावरून सुसाट धावणाऱ्या आणि सार्वजनिक शांततेचा भंग करणाऱ्या बुलेटस्वारांवर पोलिसांनी विशेष मोहीम राबवून दणका दिला आहे. वैजापूर पोलीस स्टेशनचे प्रभारी अधिकारी सत्यजीत ताईतवाले यांच्या नेतृत्वाखाली शहरात ही धडक कारवाई करण्यात आली असून, यामुळे हुल्लडबाजी करणाऱ्या दुचाकीस्वारांचे धाबे दणाणले आहेत.
गेल्या काही दिवसांपासून वैजापूर शहरात आणि पोलीस स्टेशनच्या हद्दीत मध्यरात्री तसेच दिवसादेखील काही दुचाकीस्वार, विशेषतः बुलेट धारक, त्यांच्या गाड्यांच्या सायलेन्सरमध्ये बेकायदेशीर बदल करून मोठा आवाज करत फिरत असल्याचे दिसून येत होते. या कर्णकर्कश आवाजामुळे सर्वसामान्य नागरिक, ज्येष्ठ नागरिक, लहान मुले आणि विशेषतः रुग्णांना प्रचंड मनस्ताप सहन करावा लागत होता. या त्रासाबाबत नागरिकांकडून पोलिसांकडे सातत्याने तक्रारी प्राप्त होत होत्या. या तक्रारींची गांभीर्याने दखल घेत, पोलीस निरीक्षक सत्यजीत ताईतवाले यांनी अशा बेशिस्त वाहनधारकांवर कारवाई करण्यासाठी विशेष पथके तयार केली आणि शहराच्या मुख्य चौकांमध्ये सापळा रचला.
पोलिसांनी राबवलेल्या या मोहिमेदरम्यान एकूण ८ बुलेट वाहनांवर कारवाई करण्यात आली आहे. यामध्ये MH 20 EX 3781, MH 20 EN 4007, MH 20 FA 0749, MH 20 FN 1170, MH 20 DL 0098, MH 12 NT 9578, MH 20 DH 6950, आणि MH 20 FQ 6611 या क्रमांकांच्या वाहनांचा समावेश आहे. ही सर्व वाहने जप्त करून पोलीस ठाण्यात आणण्यात आली. तपासणीअंती या वाहनांचे सायलेन्सर बदलल्याचे आणि त्यातून निघणारा आवाज हा सार्वजनिक शांततेस बाधा आणणारा असल्याचे स्पष्ट झाले. परिणामी, मोटार वाहन अधिनियमाचे कलम १९४F (a) (ii) अन्वये या वाहनधारकांवर दंडात्मक कारवाई करण्यात आली असून, एकूण ८,००० रुपयांचा दंड वसूल करण्यात आला आहे.
केवळ दंड आकारून पोलीस थांबले नाहीत, तर त्यांनी एक पाऊल पुढे टाकत या वाहनांचे बेकायदेशीर आणि आवाज करणारे सायलेन्सर जागेवरच काढून टाकले. या वाहनधारकांना त्यांच्या दुचाकींना कंपनीचे मूळ सायलेन्सर बसवण्यास भाग पाडले आणि त्यानंतरच कायदेशीर प्रक्रिया पूर्ण करून वाहने मालकांच्या ताब्यात देण्यात आली. पोलिसांनी घेतलेल्या या कठोर भूमिकेचे शहरात स्वागत होत आहे. अशा प्रकारच्या कारवाईमुळे सार्वजनिक ठिकाणी ध्वनी प्रदूषणावर नियंत्रण मिळवण्यास मदत होणार असून, नियमांचे उल्लंघन करणाऱ्यांना हा एक मोठा इशारा मानला जात आहे.
या यशस्वी कारवाईनंतर पोलीस निरीक्षक सत्यजीत ताईतवाले यांनी शहरातील तरुणांना आणि दुचाकीस्वारांना कळकळीचे आवाहन केले आहे. त्यांनी म्हटले आहे की, “ज्या बुलेटधारकांनी आपल्या गाड्यांना कर्णकर्कश आवाज करणारे सायलेन्सर बसवले आहेत, त्यांनी ते स्वतःहून तात्काळ काढून टाकावेत. कायद्याचे पालन करणे हे प्रत्येक नागरिकाचे कर्तव्य आहे. सार्वजनिक आणि सामाजिक शांतता अबाधित राखण्यासाठी सर्वांनी सहकार्य करावे. यापुढेही अशा प्रकारची कारवाई सातत्याने सुरू राहील, त्यामुळे नियमांचे उल्लंघन करणाऱ्यांनी वेळीच सावध व्हावे.”
सदरची धडक कारवाई वरिष्ठ पोलीस अधिकाऱ्यांच्या मार्गदर्शनाखाली पार पडली. यामध्ये पोलीस अधीक्षक डॉ. विनयकुमार मे. राठोड, अपर पोलीस अधीक्षक अन्नपुर्णासिंह, आणि उपविभागीय पोलीस अधिकारी भागवत फुंदे यांच्या सूचनांनुसार वैजापूर पोलीस निरीक्षक सत्यजीत ताईतवाले, पोलीस उपनिरीक्षक नितीन जे. नलवडे, पोलीस उपनिरीक्षक नागरगोजे, तसेच पोलीस अंमलदार अविनाश भास्कर, रावसाहेब रावते, कुलदीप नरवडे, प्रशांत गिते, प्रल्हाद जटाळे, अभिजीत डहाळे आणि अमोल कांबळे यांनी प्रत्यक्ष सहभाग घेतला. पोलिसांच्या या ‘ॲक्शन मोड’मुळे आता वैजापूरच्या रस्त्यांवर शांतता नांदेल, अशी आशा व्यक्त केली जात आहे.
Get the latest Marathi news, Maharashtra news, and updates from politics, election, sports, entertainment, health, agriculture, business, and religion – only on headlinesmarathi.com.
