भारतीय जनता पक्षाचे नगराध्यक्ष पदाचे उमेदवार डॉ दिनेश परदेशी यांच्यावर आतापर्यंत वैजापूरकरांनी विश्वास दाखवला आहे. त्यांच्या पाठीशी केंद्रातील व राज्यातील सरकार आहे. त्यामुळे वैजापूरच्या नगराध्यक्ष पदासाठी डॉ दिनेश परदेशी, भारतीय जनता पक्ष व राष्ट्रवादी काँग्रेस पक्षाचे नगरसेवक पदाचे सर्व उमेदवार यांना भरघोस मतांनी निवडून द्या असे आवाहन भारतीय जनता पक्षाचे प्रदेशाध्यक्ष रविंद्र चव्हाण यांनी गुरुवारी वैजापूर येथे केले.
वैजापूर नगर परिषदेच्या दोन डिसेंबर रोजी होत असलेल्या सार्वत्रिक निवडणुकीच्या पार्श्वभूमीवर येथील भारतीय जनता पक्षाचे नगराध्यक्ष पदाचे उमेदवार डॉ. दिनेश परदेशी व पक्षाचे तसेच आघाडीतील राष्ट्रवादी काँग्रेसचे नगरसेवक पदाचे उमेदवार यांचा प्रचार करण्यासाठी ते वैजापूर येथे आले होते. त्यांच्या उपस्थितीत पंचायत समिती कार्यालय परिसरात जाहीर सभा घेण्यात आली. त्यावेळी ते बोलत होते.
यावेळी मंत्री अतुल सावे, माजी केंद्रीय अर्थ राज्य मंत्री डॉ भागवत कराड, आमदार विक्रांत पाटील, जिल्हाध्यक्ष संजय खंबायते, नगराध्यक्ष पदाचे उमेदवार डॉ. दिनेश परदेशी, माजी नगराध्यक्षा शिल्पा परदेशी, बाळासाहेब संचेती, अकिल शेख, कल्याण दांगोडे, अविनाश गलांडे, प्रकाश चव्हाण, उल्हास ठोंबरे, पंकज ठोंबरे, कैलास पवार आदी मान्यवरांची प्रमुख उपस्थिती होती.
चव्हाण म्हणाले, ही निवडणूक केवळ नगराध्यक्ष व नगर सेवक पदांची नाही तर ही निवडणूक भावी पिढ्याचे जीवन घडवणारी आहे. केंद्रात मोदींचे सरकार आहे व राज्यात देवेंद्र फडणवीस यांच्या महायुतीचे सरकार आहे. वाढती लोकसंख्या लक्षात घेता या शहराला कशाची गरज आहे त्या सर्व सोयी सुविधा देण्यासाठी सरकार कटी बद्ध आहे. या शहराने आतापर्यंत डॉ दिनेश परदेशीं यांच्यावर विश्वास ठेवला आहे.
तसेच, केंद्रातील व राज्यातील सरकार हेही डॉ. दिनेश परदेशी यांच्या पाठीशी उभे आहे. पंतप्रधान नरेंद्र मोदी यांनी हर घर जल ही योजना प्रत्येकाला नळाद्वारे स्वच्छ पाणी मिळावे यासाठी आणली आहे. निधी उपलब्ध करून देण्यासाठी केंद्रातील व राज्यातील सरकार कटीबद्ध आहे. शासकीय जागावरील गरिबांची घरकुले नियमित करण्यासाठी धोरण आणण्यासाठी प्रयत्न करू असे त्यांनी सांगितले. केंद्रातील व राज्यातील सरकार एक विचारांचे असेल तर विकासात गतिमानता येते असे ते म्हणाले.
डॉ. दिनेश परदेशी यांनी शहरातील पाणीपुरवठा योजनेसाठीचा १८२ कोटींचा प्रस्ताव मंजुर करावा, त्या अंतर्गत जायकवाडी व नारंगी धरणातून पाणी घेण्याचे नियोजन आहे. हा प्रस्ताव मंजुर करावा तसेच शहरातील वाहतूक कोंडी टाळण्यासाठी रिंग रोड (वळण रस्ता) मंजुर करावा, स्वच्छता व अन्य विकासासाठी निधी द्यावा अशी मागणी केली. मागील पाच वर्षात दोनशे कोटी व पंचवीस वर्षात जवळपास दिड हजार कोटींची विकास कामे केली अशी माहिती त्यांनी दिली.
माजी केंद्रीय अर्थ राज्य मंत्री डॉ. भागवत कराड यांनी केंद्रातील व राज्यातील विविध योजना प्रभावीपणे राबवण्यासाठी डॉ दिनेश परदेशी यांना अध्यक्ष म्हणून व भाजप राष्ट्रवादी काँग्रेसच्या उमेदवारांना बहुमताने निवडून देण्याचे आवाहन केले. मंत्री अतुल सावे यांनी शहराच्या विकासासाठी कुठलाही निधी कमी पडणार नाही अशी ग्वाही दिली.
Get the latest Marathi news, Maharashtra news, and updates from politics, election, sports, entertainment, health, agriculture, business, and religion – only on headlinesmarathi.com.
