वैजापूर । दिपक बरकसे
अज्ञात चोरट्यांनी चक्क ट्रॅक्टर ट्रॉली लंपास केल्याची घटना वैजापूर तालुक्यातील लाडगाव शिवारात घडली आहे. या घटनेमुळे परिसरात खळबळ उडाली आहे. ही चोरी 27 जुलै रोजी सकाळी 7 वाजता उघडकीस आली. याप्रकरणी वीरगाव पोलिस ठाण्यात गुन्हा दाखल झाला असून, तपासाला सुरुवात झाली आहे.
गोयगाव येथील चंद्रकांत चांगदेव मोटे (वय 52) यांनी पोलिसांत तक्रार नोंदवली. त्यांच्या मते, त्यांचे वडील लाडगाव शिवारात राहतात आणि त्यांच्या मालकीची ट्रॉली (क्रमांक MH 20 AY 3496) अज्ञात चोरट्यांनी चोरली. ही ट्रॉली शेतीसाठी अत्यंत महत्त्वाची होती. सकाळी ट्रॉली जागेवर नसल्याचे लक्षात येताच मोटे यांनी शोधाशोध केली, पण काहीच हाती लागले नाही. अखेर त्यांनी पोलिसांत धाव घेतली.
पोलिसांनी तपास सुरू केला असून, परिसरातील सीसीटीव्ही फुटेज तपासले जात आहेत. शेतकऱ्यांमध्ये या घटनेमुळे चिंता पसरली आहे. शेतीच्या अवजारांवर चोरट्यांचा वाढता डोळा पाहता पोलिसांनी गस्त वाढवावी, अशी मागणी शेतकऱ्यांनी केली आहे. नागरिकांना संशयास्पद हालचाली दिसल्यास त्वरित पोलिसांना कळवण्याचे आवाहन करण्यात आले आहे.
Get the latest Marathi news, Maharashtra news, and updates from politics, election, sports, entertainment, health, agriculture, business, and religion – only on headlinesmarathi.com.
